Stjernen vann hopp-NM, Johansson på pallen med fall
Andreas Stjernen vart noregsmeister i hopp stor bakke framfor Johann André Forfang. Robert Johansson tok bronse trass i fall i første omgang.
Johansson landa som siste hoppar i første omgang på 141 meter og såg ut til å ha teke leiinga, men kort etter nedslaget skar den høgre skia ut, og han fall framover. Han kom seg på beina og gjekk hovudristande ut av bakken med 7.-plass.
- Det var eit veldig godt skihopp, men dessverre vart det ei dårleg landing. Det ser ut som det gjekk fint med han, og det er det viktigaste, sa landslagssjef Alexander Stöckl til NRK.
Johansson sa også at han trur det går bra med kneet, og understreka det då han hoppa 141 meter også i finaleomgangen. Dermed hadde han dei to lengste sveva i konkurransen.
Stjernen hoppa 138,5 meter i første omgang og tok leiinga 5,9 poeng framfor Forfang (135,5 meter) og 8,2 framfor Halvor Egner Granerud (134,5 meter). Han forsvarte leiinga med 133,5 meter som siste hoppar i finaleomgangen og sigra 5,0 poeng framfor Forfang.
Sistnemnde hoppa 134 meter i finaleomgangen, slo Johansson med halvanna poeng og tok sølv i storbakke-NM for fjerde år på rad.
Granerud måtte nøye seg med fjerdeplass.
(©NPK)
Andreas Stjernen på veg mot NM-gull i hopp stor bakke tysdag. Foto: Ned Alley / NTB scanpix
Robert Johansson datt etter å ha fått til det lengste hoppet i første omgang i hopp-NM i Granåsen tysdag. Foto: Ned Alley / NTB scanpix
