Stoltenberg maner til raske leveransar til Ukraina i skuggen av russisk offensiv

Natos-sjef Jens Stoltenberg seier det hastar med å levere ammunisjon, drivstoff og reservedelar til Ukraina. Han meiner Russland no har starta ein lenge frykta offensiv.

– Tempo kan redde liv. Jo raskare vi får inn forsyningar til den ukrainske fronten, jo fleire liv kan vi redde, understreka generalsekretæren under ein pressekonferanse i Brussel måndag.

Stoltenberg møtte pressa før Natos forsvarsministrar samlast i Brussel tysdag og onsdag. Forsvarsminister Bjørn Arild Gram (Sp) deltek på vegner av Noreg.

Møtet vil ta for seg Ukrainas behov, spesielt med tanke på våpenleveransar.

Frykta russisk offensiv

Ukrainske styresmakter har nyleg åtvara om at Russland kan prøve ein stor «symbolsk» offensiv aust i landet seinare denne månaden for å markere årsdagen for invasjonen, som starta 24. februar i fjor.

Måndag konkluderte Stoltenberg med at den russiske offensiven er i gang.

– På same måte som president Putin rustar opp, må vi halde oppe og auke støtta til Ukraina. Eg ser fram til nye leveransar av utstyr, sa Nato-sjefen.

Krigen tærer på lagera

Samtidig påpeika han at våpena og ammunisjonen Ukraina får frå Nato, tærer på lagera til alliansen.

– Forbruksraten er no mange gonger høgare enn produksjonsraten. Forsvarsindustrien er under sterkt press, og ventetidene på nye bestillingar har auka betrakteleg, frå 12 til 28 månader, sa Stoltenberg.

Han oppmoda samtidig forsvarsindustrien til å auke produksjonen og medlemslanda til å inngå fleirårige avtalar.

– Kampfly blir eit tema

Førre veke var Ukrainas president Volodymyr Zelenskyj på sjarmoffensiv i Europa for å sanke støtte til kampfly-donasjonar. Han fekk eit tja frå Frankrike og Storbritannia, og nei frå land som Sverige og Belgia.

Stoltenberg kom heller ikkje med nokon nye løfte til Ukraina under pressekonferansen måndag.

– Det går no føre seg ein diskusjon om støtte i form av fly, og eg forventar at det også vil bli teke opp i morgon på møtet i Brussel, sa han.

Stoltenberg understreka at Nato-land som leverer kampfly til Ukraina, ikkje vil gjere Nato til ein del av konflikten.

Går vidare med norsk-tysk initiativ

Nato-sjefen varsla også at alliansen opprettar ein eigen, koordinerande eining som skal avdekkje svakheiter i kritisk, undersjøisk infrastruktur.

– Dette vil støtte opp under innsatsen vår for å førebyggje og motverke truslar mot kritisk infrastruktur, inkludert undersjøiske kablar og røyrleidningar.

Eininga skal halde til på Natos hovudkvarter i Brussel.

Det var statsminister Jonas Gahr Støre (Ap) og Tysklands statsminister Olaf Scholz som i fjor vinter foreslo å opprette eit eige Nato-senter for å verne viktig energi-infrastruktur.

Initiativet kom etter eksplosjonane på dei to Nord Stream-røyrleidningane i Austersjøen.

(©NPK)

Natos generalsekretær Jens Stoltenberg møtte pressa dagen før forsvarsministrane i alliansen skal samlast i Brussel tysdag og onsdag. Foto: Olivier Matthys / AP / NTB

Ukrainas president Volodymyr Zelenskyj (t.v.) var sist veke på rundtur i Europa for å samle støtte til kampfly-donasjonar. Her er han saman med Tysklands statsminister Olaf Scholz og Frankrikes president Emmanuel Macron. Foto: Thibault Camus / AP / NTB

Jonas Gahr Støre og Olaf Scholz tok initiativ til å opprette eit eige Nato-senter for å verne kritisk infrastruktur då Støre var i Berlin i fjor. Foto: Javad Parsa / NTB

Annonse
Annonse