Storbritannia og EU ser ulikt på utsiktene for gjennombrot
Storbritannias finansminister trur på snarleg gjennombrot i forhandlingane med EU. Men presidenten i EU-kommisjonen er ikkje optimistisk.
Finansminister Philip Hammond sa torsdag til BBC at det har vore bevegelse i EU som kan leie til eit gjennombrot i forhandlingane om brexit om få dagar.
Hammond sa at framgangen han meiner å ha merkt seg, kan opne for ei ny avstemming neste veke om skilsmisseavtalen til statsminister Theresa May, som vart avvist i underhuset i førre månad.
Omtrent samtidig sa presidenten i EU-kommisjonen Jean-Claude Juncker at han framleis er pessimist og fryktar ein ukontrollert britisk utgang frå EU, trass i konstruktive samtalar med May i Brussel onsdag.
Juncker sa torsdag at ein brexit utan avtale vil ha «fryktelege økonomiske og sosiale konsekvensar» både i Storbritannia og på kontinentet, og at han gjer det han kan for å unngå det.
- Men eg er ikkje veldig optimistisk, understreka han.
(©NPK)
