Storfavoritten knuste alle i sykkel-VM, Wærenskjold på 5.-plass

Den belgiske storfavoritten Remco Evenepoel var i ein klasse for seg i temporittet for juniorar i sykkel-VM. Søren Wærenskjold skuffa noko med sin 5.-plass.

Evenepoel brukte 33,15 minutt på dei 27,7 kilometerane i Innsbruck. Han var dermed heile 1,24 minutt framfor nestemann på lista, australske Lucas Plapp.

Søren Wærenskjold kjem frå Mandal, men syklar for Ringerike. 18-åringen var ein av favorittane saman med belgiaren Evenepoel framfor rittet tysdag.

Belgiaren har vunne nesten alt han har deltatt i denne sesongen, men vart slått av Wærenskjold på ein kortare tempo tidlegare i sommar.

Allereie etter 18,1 kilometer hadde belgiaren slått knockout på konkurrentane i Innsbruck og nesten tatt igjen Wærenskjold som starta eitt og eit halvt minutt framfor.

Nordmannen tok seg saman etter sjokket og enda i mål 1,50 minutt bak vinnaren. I fjor enda 18 åringen på 33.-plass på VM-tempoen i Bergen.

Han hadde 13 sekund opp til italienske Andrea Piccolos bronse tysdag.

- Eg er skuffa. Eg var for dårleg i midtpartiet. Hovudet var nok ikkje heilt med der. Eg veit at eg kan mykje betre enn dette, sa Wærenskjold til TV 2.

- Eg vart jo litt stressa då eg vart tatt igjen. Remco var jo berre heilt rå denne gongen, sa nordmannen.

Fredrik Gjesteland Finnesand frå Sandnes starta med sykling for berre eitt år sidan. Han trente seg opp igjen etter ein kneskade på fotballbana med å sykle, og treningsdagboka hans på Strava var så imponerande at Sandnes Sykleklubb tok kontakt. Tysdag stod han på startstreken i VM.

Nordmannen velta tidleg og gjekk til legesjekk etter målgang med ei oppriven og blodig drakt. Han enda på 39.-plass, slått med 4,18 minutt av teten.

(©NPK)

Søren Wærenskjold var ein av favorittane på tempoen for juniorar i VM tysdag. Foto: Marit Hommedal / NTB scanpix

Annonse
Annonse