Stortinget vil ikkje heise regnbogeflagget under Pride

Stortingets presidentskap har vedtatt at regnbogeflagget ikkje skal vaie frå stortingsbygningen under Pride-paraden i Oslo laurdag.

Miljøpartiet Dei Grøne hadde bedt om flagginga. Presidentskapet behandla saka i eit møte torsdag, skriv Dagbladet.

I grunngivinga for avslaget seier stortingspresident Tone W. Trøen (H) at det blir flagga dagleg med statsflagget på Stortinget. Utover dette vil det berre bli flagga ved ekstraordinære høve som opninga av Stortinget, internasjonale besøk og den samiske nasjonaldag.

NRK skriv at stortingspresidenten seier at dei held seg til flaggreglementet som vart vedtatt 9. mai i år.

- Presidentskapet har ved behandlinga av flaggreglementet våren 2019 etter ei grundig vurdering konkludert med at ein ikkje ønsker å opne for flagging ved politiske markeringsdagar og arrangement, seier Trøen til NRK og Dagbladet.

MDGs stortingsrepresentant Une Aina Bastholm seier til Dagbladet at det burde vere sjølvsagt for Stortinget å flagge.

- Stortinget svarar som om det er politisk kontroversielt å markere støtta til Pride-paraden og feire mangfald og likestilling i Noreg.

(©NPK)

Illustrasjonsfoto: Stian Lysberg Solum / NTB scanpix

Annonse
Annonse