Lindvik tilbake etter fall, fem nordmenn vidare etter kvalifiseringa i Planica

Marius Lindvik rista av seg fallet og kvalifiserte seg saman med fire andre nordmenn til skiflygingsrennet i Planica fredag. Ingen av dei imponerte.

Bortsett frå Marius Lindviks fall i sitt første møte med mammutbakken, var det lite dramatikk under treninga og kvalifiseringa på torsdag. Det var flott vêr med greie flygeforhold for hopparane. Det som mangla var kanskje litt meir trekk imot aller nedst i bakken.

Då 20-åringen gjekk inn for landing i første treningsomgang gjekk han ut i spagaten og måtte over ende. Farten i landingsaugneblinken er nesten 120 km/t, slik at uansett korleis ein landar så vil det gjere vondt.

Lindvik valde å stå over den andre treningsomgangen.

Ifølgje pressetalsmann for hopparane, Steinar Bjerkmann, fekk han seg ein liten trykk i ryggen og pådrog seg nokre skrubbsår i andletet og dessutan ein hoven leppe, men var elles ved godt mot.

I kvalifiseringa landa han støtt på 219,5 meter og klarte å kvalifisere seg. Best var verdscupleiaren Ryoyu Kobayashi. Japanaren hoppa 248 meter frå avsats 1. Med 247,8 poeng var han 2,8 poeng føre Markus Eisenbichler. Tyskaren hadde òg 248 meter, men med éin avsats høgare fart.

Heimehåpet Timi Zajc var tredje best. Han hadde 239 meter og med 1 x 19,5 og 2 x 20 i stil vart det 236,0 poeng.

Dei andre norske hopparane var bra med på notane i dei to treningshoppa med unntak av Robert Johanssons andre svev på berre 172 meter.

I kvalifiseringa hadde han «berre» 198,5 meter. Det heldt til å kvalifisere seg, men heller ikkje meir.

Johann André Forfang fekk opp 214,5 og vart med det beste norske på 11.-plass. I treninga hadde han småpene 213,5 og 215 meter med pressa fart.

Anders Fannemel fekk derimot problem med å ta seg vidare blant dei 40 beste. Hoppet hans på 208 meter var 1,6 poeng unna kvalifiseringsgrensa.

Robin Pedersen kvalifiserte seg med 223,5 meter. Hopparen frå Stålkameratene hadde 232,5 og 223,5 meter i sine to treningshopp.

Halvor Egner Granerud slit framleis litt med å få taket på skiflyging. Under treninga hadde han 200,5 og 194,5. Han kvalifiserte seg derimot greitt med 211,5 meter.

(©NPK)

Marius Lindvik måtte over ende i sitt første møte med skiflygingsbakken i Planica. Her under hoppinga i Vikersund i førre veke. Foto: Terje Bendiksby / NTB scanpix

Annonse
Annonse