SV ber Stortinget stoppe utvisinga av Mustafa Hasan
SV tek utvisinga av Mustafa Hasan (18) til Stortinget. Dei fremjar eit forslag om å vente med behandlinga av alle saker for lengeverande asylsøkjande barn.
Dermed håpar partiet å få stoppa utvisinga av Hasan, som har fått beskjed om å reise ut av landet innan 7. desember. Årsaka er at mora oppgav feilaktig nasjonalitet då dei kom til Noreg i 2008.
– Denne saka går over alle støvelskaft, og det er heilt meiningslaust at ein 18 år gammal gut skal straffast for det mor hans gjorde då han var seks år. Han skulle og burde fått opphald for mange år sidan, og no bruker norske styresmakter sin eigen tregleik imot han. Det går berre ikkje an å behandle folk på denne måten, seier Karin Andersen i SV.
Ho håpar Stortinget rekk å behandle saka så raskt som mogleg, men dei når ikkje å gjere det før Hasan eigentleg må forlate landet. Derfor håpar ho at advokaten hans får gjennomslag for å utsetje fristen for utsending, slik han har kravd.
– Eg reknar det som svært lite sannsynleg at han blir send ut no, og reknar med at Stortinget rekk å behandle dette før det blir aktuelt, seier Andersen til NTB.
I forslaget, som Andersen fremjar saman med fleire andre SV-representantar, ber ho om at alle saker som gjeld lengeverande asylsøkjande barn, blir lagde til sides «fram til det er gjennomført en gjennomgang av Utlendingsnemndas praksis i disse sakene, herunder om barnets beste, barnets oppholdstid og humanitære hensyn veies i tråd med lovgivers intensjon».
Sakene som blir lagde til sides, må inkludere personar med lang opphaldstid som har fylt 18 år etter 1.1.2019, skriv SV.
– Barn er ikkje ansvarlege for det foreldra deira har gjort. Han har vore her i snart 13 år og har vorte norsk. Han kan ikkje sendast til eit land der han verken kan språket eller har nokon føresetnader for å klare seg, seier Andersen.
(©NPK)
Karin Andersen (SV) ber Stortinget om å stanse utsendinga av Mustafa Hasan (18). Foto: Vidar Ruud / NTB
