SV foreslår å leggje ned to storfylke

Ein knapp månad etter at storfylka Viken og Troms og Finnmark vart etablerte, varslar SV at dei fremjar forslag for Stortinget om å leggje dei ned.

– No har vi fått ei historisk moglegheit til å oppheve tvangen regjeringa har kome med i danninga av desse monsterkonstruksjonane. Stortinget kan og bør starte denne prosessen, seier SVs Freddy André Øvstegård til NTB.

Saman med fleire andre av stortingsrepresentantane i partiet vil han fremje forslaget når Stortinget igjen blir samla tysdag neste veke. Grunnen til at SV har kasta seg rundt, er at Frp har gått ut av regjeringa.

– Kunstig fleirtal

Både SV, Ap, Sp og Frp har gjort det klart at dei er imot Viken, og sidan Frp er ute av regjeringa, er det ikkje lenger fleirtal for tvangssamanslåinga.

Forslaget gjeld i prinsippet alle fylke.

– Alle tvangssamanslåtte fylke skal givast moglegheit til å ta ut skilsmisse viss dei vil. Det kunstige fleirtalet denne reforma har hatt, er i ferd med å smuldre opp, seier Øvstegård.

Førebels er det Viken som står øvst på lista når det gjeld oppheving.

– Også fleirtalet i fylkestinget har peika på at dei ønskjer å leggje ned storfylket, påpeikar Øvstegård.

Kan bli vedtatt

Det var NRK som først melde om saka. Statsvitar Harald Borgebund ved Høgskolen i Østfold seier til NRK at det er mogleg at forslaget blir vedtatt, sidan det er fleirtal i Stortinget for å reversere Viken.

– Men detaljane i forslaget vil bety mykje for om det skjer, seier Borgebund.

Viken vart oppretta 1. januar i år. Fylket strekkjer seg frå Hardangervidda til Halden og har 1,2 millionar innbyggjarar.

(©NPK)

SVs Freddy André Øvstegård vil leggje fram forslag for Stortinget om at tvangssamanslåtte fylke, som Viken, skal kunne søkje om skilsmisse. Her saman med SV-leiar Audun Lysbakken. Foto: Terje Pedersen / NTB scanpix

Annonse
Annonse