SV meiner Aps 100-dagarsplan er skuffande
Nestleiar i SV Torgeir Knag Fylkesnes er ikkje spesielt imponert over Arbeidarpartiets 100-dagarsplan.
– Vi fekk kaffien i halsen då vi såg at Ap la opp til så lite redusering av forskjellar i samfunnet, seier nestleiar i SV Torgeir Knag Fylkesnes til NRK.
100-dagarsplanen er ei oversikt over dei første tinga Støre skal gjennomføre viss Arbeidarpartiet vinn valet til hausten.
Ap gjer ikkje nok for å fjerne sosiale forskjellar og gjenreise velferdsstaten, meiner SV, som samtidig reagerer på at berre tre av 40 tiltak er retta mot usosiale kutt.
– Nokre av dei mest hjarterå kutta i velferdsstaten som rammar dei som verkeleg treng hjelp aller mest, det ligg faktisk ikkje i planen til Ap, seier Fylkesnes.
Ifølgje Støre har Arbeidarpartiet prioritert punkt som vil sikre at fleire kjem i arbeid, at velferda blir sikra og at det blir kutta utslepp og skapt jobbar, dersom han blir vald.
– Vi vil at Arbeidarpartiet i regjering umiddelbart kan starte arbeidet med ein ny kurs som betyr noko i kvardagen til folk, har Støre sagt til NTB.
(©NPK)
Torgeir Knag Fylkesnes er nestleiar i SV. Foto: Torstein Bøe / NTB
