SV-nestleiar får gratis pendlarleilegheit – leiger ut eigen bustad i Oslo
SVs nestleiar Torgeir Knag Fylkesnes får gratis pendlarleilegheit i Oslo av Stortinget, sjølv om han eig ei leilegheit i hovudstaden.
Grunnen til at Fylkesnes fekk tildelt bustad av Stortinget, var at han leigde ut si eiga leilegheit før han fekk pendlarleilegheit, skriv Aftenposten.
Stortingsdirektør Marianne Andreassen stadfestar at Fylkesnes har hatt pendlarbustad på rett grunnlag. At SV-nestleiaren leiger ut ei leilegheit i Oslo, reknar dei ikkje som relevant.
– Mi vurdering frå starten var at eg hadde følgt både regelverk og lovverk i denne saka. Det har eg no òg fått stadfesta frå Stortinget, seier han.
Til avisa seier SV-nestleiaren at han hadde opplyst Stortinget om leilegheita i Oslo dersom regelverket hadde kravd det. Han seier han meiner reglane for pendlarbustadene til politikarane bør strammast inn.
Denne veka har avisa skrive om to tilfelle der stortingspolitikarar eig bustad nærare enn 40 kilometer frå Stortinget, men likevel får gratis bustad på rekninga til staten. Kjell Ingolf Ropstad (KrF) leigde ut tomannsbustaden sin i Lillestrøm, medan Tellef Inge Mørland (Ap) bur i bustaden sin i Arendal, men eig i tillegg ei leilegheit i Oslo sentrum.
(©NPK)
Torgeir Knag Fylkesnes (SV) får gratis pendlarleilegheit i Oslo av Stortinget, trass i at han eig ei leilegheit i hovudstaden. Foto: Hanna Johre / NTB
