SV og Raudt ber om at Stortinget får hemmeleg Nav-rapport
SV og Raudt krev at Stortinget får tilgang til heile rapporten frå 2014 som slo fast at eksportforbod av trygd var ulovleg.
VG skreiv tysdag om delar av innhaldet i ei intern trygdeutgreiing i regjeringa frå 2014. Nav-rapporten slo fast at Noregs praksis med å nekte folk å ta med seg trygd til utlandet var i strid med EØS-avtalen – men at det var mogleg å utnytte handlingsrommet for å lage unntak.
Delar av rapporten er sladda – og torsdag var saka oppe til debatt i Stortinget. Der kravde Raudt at heile rapporten blir utlevert og fekk støtte frå SV, skriv VG.
Raudts Mimir Kristjansson sa at rapporten kan fastslå om staten gjorde seg skuldig i grov aktløyse, det vil seie om dei handla mot betre vitande.
SVs Kirsti Bergstø meiner det er viktig at kontrollkomiteen får tilgang til ein usladda versjon, slik at Stortinget kan få naudsynt informasjon.
Høgres Henrik Asheim seier det relevante frå rapporten er klargjord av granskingsutvalet som laga rapporten «Blindsonen» i 2020, og som har fått sjå han.
(©NPK)
Kirsti Bergstø (SV) meiner det er viktig at kontrollkomiteen får tilgang til ein usladda versjon av Nav-rapporten frå 2014. Foto: Stian Lysberg Solum / NTB / NPK
