Nordre

Svensk elev tok med granat på skulen

Eit skulebarn i Kristianstad i Sverige ville vise vennene eit trofé frå sommaren. Enden på visa vart at den nasjonale bombegruppa i landet rykte ut.

Det viste seg nemleg at barnet hadde funne ein skarp granat.

- Barnet fann granaten tidleg i sommar, hadde den heime hos seg, og tok den med på skulen i dag, sa operasjonsleiaren til politiet Thomas Söderberg til TT seint tysdag.

- Ein lærar såg noko vedkommande trudde kunne vere farleg, og kontakta politiet. Då vi kom fram, konstaterte vi at det var ein liten granat som sannsynlegvis var ustabil, sa Söderberg.

Granaten stammer truleg frå skytefeltet Rinkaby utanfor Kristianstad.

- Han har sannsynlegvis lege eit stykke nede i bakken på skytefeltet ei god stund, elles hadde militæret tatt hand om den tidlegare, meiner operasjonsleiaren.

Ingen vart skadde i hendinga, men eit område sentralt i Kristianstad var sperra av ein periode på kvelden.

- Saka er avslutta frå vår side, men det som skjedde var jo ikkje bra, og eg antar at foreldra kjem til å ta ein liten prat med barnet.

(©NPK)

ANNONSE
Annonse
ANNONSE
Annonse