Svensk statsborgar blir Somalias nye statsminister

Den svensk-somaliske sivilingeniøren Mohamed Hussein Roble er utnemnd til Somalias nye statsminister etter norsk-somaliske Hassan Ali Khaire.

Roble er ny i politikken, men har mellom anna studert på Kungliga tekniska högskolan og jobba for Den internasjonale arbeidsorganisasjonen (ILO).

Han kom til Sverige i 1992 på starten av borgarkrigen i Somalia og har dobbelt statsborgarskap.

Khaire var statsminister i drygt tre år, men vart avsett i juli då nasjonalforsamlinga med overveldande fleirtal stemde for eit mistillitsforslag mot han.

Mistillitsforslaget mot Khaire, som kom til Noreg som flyktning i 1989 og jobba mange år i Flyktninghjelpen, vart fremja fordi han ikkje hadde lykkast i å betre tryggingssituasjonen i landet og gjere det mogleg med demokratiske val i februar 2021.

President Mohamed Abdullahi Mohamed utnemnde Roble kort tid etter at presidenten i samarbeid med regionale leiarar vedtok å leggje død arbeidet med å reformere valsystemet.

Somalia har sidan 1969 arbeidd for å innføre eit demokratisk system der kvar person har éi stemme. Målet var at dette skulle erstatte det noverande systemet, der delegatar vel medlemmene av nasjonalforsamlinga, som så vel ein president.

(©NPK)

Annonse
Annonse