Svenske dømt for å ikkje ha fjerna rasisme frå Facebook-gruppe
Ein svensk mann er dømd til å betale bøter fordi han ikkje fjerna rasistiske kommentarar frå ei Facebook-gruppe der han er administrator.
Tysdag vart det kjent at 52-åringen blir dømd til å betale 19.200 svenske kroner i bøter i tillegg til over 40.000 kroner i sakskostnader. Han får også ein fengselsstraff på vilkår.
52-åringen frå Eskilstuna var ein av grunnleggjarane av Facebook-gruppa «Stå upp för Sverige», der han også har vore ein av administratorane. Over ein periode på halvtanna år vart det i gruppa skrive åtte kommentarar som retten meiner openbert må reknast som hets.
I ein av kommentarane vart folkegrupper samanlikna med skadedyr som må utryddast, ifølgje Aftonbladet.
Sidan kommentarane ikkje vart fjerna, meiner retten at 52-åringen braut ei lov frå 1990-talet om ansvaret som ligg på den som tilbyr ei «elektronisk oppslagstavle».
Mannen har forsvart seg med at han umogleg kunne ha oversikt over dei opp mot 250.000 kommentarane som er skrivne i gruppa kvar månad.
Lovparagrafen frå 1990-talet skal berre ha vorte brukt éin gong tidlegare, og dommen mot 52-åringen kan ankast.
(©NPK)
