Det svenske kongeparet testa negativt
Prins Carl Philip av Sverige og kona hans prinsesse Sofia er koronasmitta. Kongeparet har testa negativt, det har òg kronprinsesse Victoria og prins Daniel
Prins Carl Philip og prinsesse Sofia var i gravferda til broren til den svenske dronninga fredag, og det vart sett i verk smittesporing etter at dei to testa positivt.
Så langt er det dermed ikkje oppdaga fleire koronatilfelle i det svenske kongehuset. Carl Philip er den einaste sonen til det svenske kongeparet og nummer to i søskenflokken.
Han og prinsesse Sofia har lettare influensasymptom, men har det etter omstenda bra, skriv det svenske kongehuset på nettsidene sine. Kongens livlege leier arbeidet med smittesporinga.
Prinseparet har delteke aktivt i kampen mot koronapandemien. Prinsesse Sofia har jobba på eit sjukehus i Stockholm, medan Carl Philip har teke seg jobb i Försvarsmakten, som samordnar støtte til sivilsamfunnet under koronakrisa.
Prins Carl Philip gifta seg med Sofia Kristina Hellqvist i 2015.
(©NPK)
Prinsesse Sofia og prins Carl Philip i Slottskyrkan i Stockholm.
Foto: Maja Suslin / TT / NTB
