Svindal går for Lake Louise-start
Stjernealpinisten Aksel Lund Svindal satsar på at kneet held og seier til NRK at han planlegg å køyre verdscup i canadiske Lake Louise seinare i månaden.
Svindal har teke seg særs god tid med å komme til ei avgjerd rundt den vidare karrieren sin. No verker det klart at han iallfall får med seg utforrennet i Lake Louise 24. november og super G-rennet dagen etter.
Dei siste elleve dagane har han trent saman med alpinlandslaget i Copper Mountain i Colorado. 35-åringen svarar stadfestande til NRK på spørsmål om sesongen startar i Lake Louise.
- Eg trur han gjer det. Det har eigentleg gått ganske bra, synest eg. Det ser ganske lyst ut.
Svindal fortel at kneet verker betre enn det gjorde før sesongstart i fjor.
- Det er hevelse som er det største problemet, og det har eg klart å unngå i større grad enn i fjor, seier han.
Svindal har trøbla med det høgre kneet i fleire år og har òg operert det tidlegare. Likevel klarte han å vinne OL-gull i sørkoreanske Pyeongchang sist vinter.
(©NPK)
Aksel Lund Svindal går sannsynlegvis laus på ein ny alpinsesong.
Foto: Cornelius Poppe / NTB scanpix
