Sykling: Vuelta-start i Barcelona neste år
For første gong på 60 år skal Grand Tour-rittet Vuelta a España ha opning i Barcelona. 2023-utgåva blir trakka i gang 26. august.
Dei to første etappane skal gå i den katalanske hovudstaden, opplyste arrangøren tysdag.
Opninga skjer i form av ein 14,6 kilometer tempo, medan det dagen etter skal køyrast 181,3 kilometer mellom Mataró og Barcelona. På etappen er det planlagt to klatringar, inkludert opp ikoniske Montjuic.
Presentasjonen av dei andre etappane i det tre veker lange rittet skjer i Barcelona 10. januar.
– At La Vuelta er tilbake i Barcelona som startby etter 60 år, er gode nyheiter. Ikkje berre fordi vi kan gjennomføre eit så stort idrettsarrangement, men også fordi det endå ein gong viser at idretten er den økonomiske motoren for byen, seier Barcelonas viseordførar Jaume Collboni.
Det er berre andre gong at Barcelona har vore vertskap for opningsetappen i Vueltaen. Sist gong var i 1962. Rittet var sist innom byen i 2012.
(©NPK)
Odd Christian Eiking imponerte i Vuelta a España i 2021. Neste år skal rittet starte i Barcelona. Foto: Jorge Guerrero / AFP / NTB
