Nordre

Tåregass mot antirasistiske demonstrantar i Sør-Afrika

Sørafrikansk politi har brukt tåregass, sjokkgranatar og vasskanonar mot opposisjonelle aktivistar som demonstrerer mot rasisme ved ein skule i Cape Town.

Det venstreradikale partiet Economic Freedom Fighters (EFF) har arrangert fleire protestar mot ungdomsskulen, som ligg i ein del av Cape Town der dei fleste innbyggjarane er kvite.

Bakgrunnen er påstandar om at skulen heldt eit ball i oktober som berre kvite barn var inviterte til.

EFF, som hadde løyve til å halde ein protest med 100 deltakarar fredag, seier dei demonstrerte fredeleg då politiet gjekk til angrep. Politiet seier dei brukte makt då demonstrantane ignorerte eit pålegg og nærma seg skulen. Blant dei fleire hundre demonstrantane var det nokon som bar på machetar, kjeppar og golfkøller.

Brackenfell High School har beklaga djupt, men seier festen var privat og organisert av foreldre. Foreldra seier ballet var ope for alle som tek avgangseksamen, men at maks 100 slapp inn på grunn av pandemien.

Saka skapte stor debatt etter at ein mann delte ein video av det som skal ha vore ein fest berre for kvite.

Sist veke enda ein annan protest med vald utanfor skulen då svarte EFF-medlemmer hamna i basketak med foreldra til elevar. Videoar som vart mykje delte på nett, viser kvite som slår svarte demonstrantar.

President Cyril Ramaphosa har bede om ei etterforsking og seier scenene bringar tilbake vonde minne om ei fortid «vi aldri må søke å vende tilbake til».

Nobelprisvinnar Desmond Tutu beskriv splittinga ved skulen som «eit symbol på uløyste problem frå Sør-Afrikas fortid».

(©NPK)

Politiet stoppa EFF-medlemmer som igjen demonstrerte mot påstått rasisme ved Brackenfell High School i Cape Town fredag. Foto: Nardus Engelbrecht / AP / NTB

Fleire hundre demonstrantar møtte opp utanfor skolen i Cape Town, men opposisjonspartiet som arrangerte protesten, hadde berre fått løyve til å samle 100 personar. Foto: Nardus Engelbrecht / AP / NTB

Protesten vart arrangert av opposisjonspartiet EFF, som meiner Sør-Afrikas svarte befolkning lir som følgje av vedvarande rasisme, spesielt i nabolag som Brackenfell. Foto: Nardus Engelbrecht / AP / NTB

ANNONSE
Annonse
ANNONSE
Annonse