Taylor Swift-kaos utløyser senatshøyring i USA

Kaos og samanbrot i billettsalet til Taylor Swifts nye turné har utløyst ei høyring i Senatet i USA om mangel på konkurranse innan nettsal av billettar.

Fleire tusen Swift-fans vart sitjande skuffa – og billettlause – tilbake då Ticketmasters system braut saman sist torsdag. Problemet oppstod allereie under førehandssalet, der millionar av fans prøvde å sikre seg billettar til den kommande Eras-turneen.

Etter planen skulle det opne salet starte neste dag, men Ticketmaster enda med å avlyse salet og viste til «utilstrekkeleg billettlager» og «ekstraordinært høg etterspurnad».

– Fungerer ikkje

Den demokratiske senatoren Amy Klobuchar seier kaoset gjer det veldig klart at den billettmarknaden ikkje fungerer godt nok. No planlegg ho og den republikanske kollegaen hennar Mike Lee høyring i Senatets komité for konkurranse og forbrukarsaker.

– Førre veke vart problema i billettmarknaden smerteleg klare då Ticketmaster svikta hundretusenvis av fans som håpa å kjøpe konsertbillettar. Dei høge gebyra, nettproblema og kanselleringane kundane opplevde, viser korleis Ticketmasters dominerande marknadsposisjon gjer at selskapet ikkje er under press for å drive kontinuerleg innovasjon og forbetring, seier Klobuchar.

– Derfor vil vi halde ei høyring for å sjå korleis kundar og artistar blir ramma av manglande konkurranse, seier ho.

– Forbante

Taylor Swift har sjølv gitt uttrykk for frustrasjon og sinne over at fansen hennar brukte timevis på å prøve å skaffe seg billettar. Ho seier Ticketmaster fleire gonger hadde forsikra henne om at dei kunne takle pågangen.

– Det er fantastisk at 2,4 millionar menneske fekk billettar, men eg blir forbanna når mange fortel at dei kjenner det som om dei hadde overlevd fleire bjørneangrep på vegen, seier ho på Instagram.

(©NPK)

Taylor Swift er så populær at pågangen etter konsertbillettar fekk Ticketmasters system til å knele. No vil to senatorar ha ei høyring om mangel på konkurranse i billettmarknaden. Foto: Jordan Strauss / Invision / AP / NTB

ANNONSE

Artikkelen fortsetter etter annonsen.

Annonse
ANNONSE

Artikkelen fortsetter etter annonsen.

Annonse