Telia Carrier vann sjøfiberkontrakt
Nasjonal kommunikasjonsmyndigheit (Nkom) har inngått kontrakt med Telia Carrier om eit nytt sjøfibersamband mellom Kristiansand og Esbjerg i Danmark.
Åtte aktørar melde seg på konkurransen, og fem av dei vart inviterte til å gi Nkom tilbod. Telia Carrier vann kontrakten på rundt 29 millionar kroner.
– Denne kontrakten vil bøte på sårbarheita og auke tryggleiken for kommunikasjon mellom Noreg og andre land, seier distrikts- og digitaliseringsminister Linda Hofstad Helleland (H) i ei pressemelding.
Tryggingsdirektør Elise K. Lindeberg i Nkom opplyser at Telia Carrier vann på bakgrunn av eit tilbod som fekk best karakter på kvalitet og tryggleik.
Havfiberkabelen «Havsil» som skal kunne takast i bruk frå starten av 2022, skal gå mellom Kristiansand og Esbjerg i Danmark.
(©NPK)
Distrikt- og digitaliseringsminister Linda Hofstad Helleland (H) meiner den nye sjøfiberkabelen vil auke tryggleiken. Arkivfoto: Terje Bendiksby / NTB scanpix
