Thingnes Bø får selskap av tre debutantar i VM i skiskyting

Karoline Knotten, Alexander Fjeld Andersen og Johannes Dale får alle sjansen i det første skiskyttar-VM-et sitt i italienske Antholz i februar.

Det vart klart då Norges Skiskytterforbund presenterte det endelege uttaket sitt til meisterskapen måndag. I alt 11 utøvarar, seks menn og fem kvinner, reiser til meisterskapen som varer frå 13. til 23. februar.

Troppen inneheldt ikkje dei heilt store overraskingane. På herresida får 22 år gamle Aleksander Fjeld Andersen den første VM-sjansen i karrieren på kostnad av veteranen Lars Helge Birkeland.

Birkeland fekk sesonginnleiinga øydelagd av to lite høvelege sjukdomsperiodar, men har vist formstiging på nyåret. Søndag vart han nummer 20 på jaktstarten i Ruhpolding etter å ha skote fire fulle hus.

Fjeld Andersen enda åtte plassar lenger ned på resultatlista, men vart likevel føretrekt i VM-troppen. Geilo-løparen har fått fleire verdscupsjansar denne vinteren, og imponerte òg då han starta sesongen med tredjeplass i det nasjonale opningsrennet på Sjusjøen i november i fjor.

Sterk tropp

Den norske herretroppen til VM i Antholz består elles av Erlend Øvereng Bjøntegaard, Tarjei Bø, Vetle Sjåstad Christiansen, Johannes Dale og Johannes Thingnes Bø.

Thingnes Bø har stått over alle verdscuprenn etter jul som følgje av barnefødsel. Førre veke fødde kona Hedda Dæhli Bø sonen Gustav. Dermed er det venta at Noregs fremste skiskyttar på herresida gjer comeback i verdscupen i Pokljuka komande helg.

På kvinnesida blir det VM-debut for Karoline Offigstad Knotten i Antholz. Vingrom-jenta har vist seg fram i verdscupen ved fleire høve denne sesongen, mellom anna då ho vart nummer 13 på jaktstarten i franske Annecy rett før jul.

Knotten har òg bidrege til at det norske kvinnelaget er utan tap i stafett i vinter. Fire strake sigrar på like mange forsøk er fasiten. Knotten har gått opningsetappen på tre av dei, seinast i Ruhpolding sist veke.

25-åringen og lagvenninnene reiser derfor til Antholz som soleklare gullfavorittar.

Eckhoff favoritt

Tiril Kampenhaug Eckhoff, Marte Olsbu Røiseland, Synnøve Solemdal og Ingrid Landmark Tandrevold utgjer ikkje overraskande resten av den norske kvinnetroppen.

Eckhoff kjem til som eitt av dei aller heitaste namna på dei individuelle distansane. 29-åringen har vunne seks av dei åtte siste verdscuprenna og leier verdscupen.

Fossum-løparen har samtidig til gode å ta eit individuelt meisterskapsgull i karrieren. Merittlista inneheld så langt fire stafettgull frå VM og eitt frå OL.

(©NPK)

Aleksander Fjeld Andersen er klar for VM. Foto: Geir Olsen / NTB scanpix

Tiril Eckhoff vinn og vinn, og dei norske skiskyttarjentene er utan tap i stafett så langt i sesongen. Foto: Matthias Schrader / NTB scanpix.

Annonse
Annonse