Ti arresterte for kvitvasking i Danske Bank
Estiske styresmakter stadfestar at ti personar er arresterte i samband med skuldingar om kvitvasking av milliardar av kroner i Danske Bank.
Påtalemakta opplyser at dei ventar at fleire kjem til ål bli arresterte i saka.
Førre månad tok dansk Økokrim ut formell sikting mot banken, som er skulda for kvitvasking av fleire milliardar danske kroner. Bakgrunnen for siktinga er ein internrapport der banken erkjenner å ha hatt dårlege kontrollrutinar frå 2007 til 2015 ved filialen sin i Estland.
Rundt 200 milliardar euro, nærare 2.000 milliardar kroner, passerte i dette tidsrommet gjennom filialen, utan at verken kundar eller mistenkjelege tilhøve vart tilstrekkeleg granska.
Alle dei som no har vorte arresterte, skal ha vore tidlegare kunderådgjevarar, som mellom anna hadde som jobb å forhindre kvitvasking i den danske storbanken.
Minst éin av dei arresterte skal vere mistenkt for å ha teke imot mutingar, mens ein annan blir mistenkt for å ha hjelpt vedkommande.
(©NPK)
Illustrasjonsfoto: Stian Lysberg Solum / NTB scanpix
