Tidenes utstyrsavtale for Handballforbundet
Norges Håndballforbund har inngått ny utstyrsavtale med Hummel. Avtalen gjeld for seks år.
Avtalen inkluderer òg sportsmedisinsk rekvisita og klister.
– Dette er tidenes utstyrsavtale for Norges Håndballforbund, fortel kommersiell sjef i Handballforbundet, Jan-Erik Aalbu, i ei pressemelding.
Det står ikkje noko i pressemeldinga kva avtalen er verd, men Kampanje anslår verdien totalt til rundt 70 millionar kroner.
– Eg kan ikkje gå ut med nokon sum på kva han er verd, for avtalen er konfidensiell, seier Aalbu til NTB.
– Vi er svært glade for å ha fått dette på plass. Hummel er eit merke med sterke tradisjonar i idretten, og dei satsar spesielt hardt på handball. Det har vore viktig for oss. Dei er allereie leverandør til fleire store klubbar og landslag, seier Aalbu.
Avtalen dekkjer alle norske landslag, og dessutan Norges Håndballforbund sentralt og deira seks regionar.
(©NPK)
Dei seinaste åra har Norges Håndballforbund vore sponsa av Umbro. No har dei signert ein avtale med Hummel. Foto: Vidar Ruud / NTB scanpix
