Tidlegare brasiliansk fotballpresident utestengd på livstid

Fifa nektar Brasils tidlegare fotballpresident José Maria Marin å ha noka som helst rolle i fotballen igjen. Måndag vart han stengd ute for resten av livet.

Det var etikk-komiteen i Fifa som tok avgjerda. 86-åringen har òg fått ei bot på 1 million sveitserfranc, som svarer til oppunder 8,5 millionar kroner.

Marin vart i fjor dømt til fire års fengsel av det amerikanske rettsvesenet. Han vart straffa etter at han hadde vorte funnen skuldig i mellom anna å tatt imot stikkpengar og for kvitvasking og bedrageri. Han fekk òg den gongen ein saftig millionbot.

Marin var ein av sju FIFA-toppar som vart arresterte på eit luksushotell i Zürich i mai 2015. Han sat fem månader i fengsel i Sveits før han vart utlevert til USA.

Den tidlegare fotballpresidenten stod i spissen for komiteen som organiserte 2014-VM i Brasil.

(©NPK)

ANNONSE
Annonse