Tredjeplass for skiskyttargutane i Nove Mesto-stafetten – Tyskland overlegne

Etter VM i Pokljuka frå 10. til 21. februar har det vore ein lang og solid pause for utøvarane. Fredag var det verdscupstafett, og det vart ein liten skuffelse for dei norske stafettgutane.

Noreg var favorittar med alle fire inne blant topp fem på verdsrankinga, men såg ut til å skyte seg heilt bort. Ein sterk sisteetappe av Johannes Thingnes Bø redda tredjeplassen.

Tyskland vann suverent føre Russland, medan Noreg gjekk i mål halvtanna minutt etter tyskarane. Dei norske fekk heile tre strafferundar etter å ha brukt ni ekstraskot. Ein fransk kollaps med heile fire strafferundar førte Noreg inn i pallkampen igjen.

1. Etappe

VM-kongen Sturla Holm Lægreid gjekk først ut på verdscupstafetten i Nove Mesto og han gjorde ingen feil med fullt hus på både liggjande og ståande skyting, men Tyskland fekk likevel ei lita luke inn mot første veksling.

2. Etappe

VM-prinsen Johannes Dale gjorde som den jamgamle kollegaen sin og skaut prikkfritt på den liggjande skytinga. På ståande vart det derimot verre. Med tre ekstraskot og ein strafferunde var det over minuttet opp til Tyskland.

Dale, som normalt er blant dei raskaste i sporet, klarte ikkje ta inn noko på forspranget til Tyskland.

3. Etappe

Tarjei Bø opna sterkt i sporet og skaut som lagkameratane før han fullt hus på liggjande. Men til liks med Dale vart det tre ekstra skot og ein strafferunde på den ståande skytinga.

Det var første gong sidan 2017 at Tarjei Bø skaut på seg ein strafferunde i ein stafett i verdscupen.

4. Etappe

Når storebroren veksla med Johannes Thingnes Bø hadde han ikkje mindre enn 1.52 opp til Tyskland. Veslebror gjorde ingen feil på liggjande, og då Frankrike fekk fire (!) strafferundar på den liggjande skytinga, opna det seg moglegheiter for Noreg.

Thingnes Bø pådrog seg ein strafferunde på den siste ståande og måtte dermed sjå Russland kapre andreplassen bak dei suverene tyskarane.

(©NPK)

Dei norske gutane skuffa i Nove Mesto: Foto: Primoz Lovric / NTB