Nordre

Trond Giske taus om attval

Trond Giske seier det er for tidleg å svare på om han vil søke attval til Stortinget i 2021. Men valkampmodus har han vore i lenge.

- Det er eit år til eg må ta stilling til det, seier Giske til NTB.

Ap-politikaren peikar på at det framleis er lenge til nominasjonskomiteane skal bestemme kven som skal stå på listene til stortingsvalet i 2021.

Men at Giske er tilbake i politikken, det er det ingen tvil om. Giske viser til at han deltok aktivt i valkampen føre lokalvalet tidlegare i år.

- Eg trur eg var i 60 kommunar og drev valkamp rundt omkring i heile landet. Eg har vore i aktivt politisk arbeid så å seie heile tida etter at eg kom tilbake frå sjukmelding, seier han.

I det politiske Noreg er det no knytt stor spenning til Giskes vidare karriere.

I januar 2018 gjekk han av som nestleiar i Arbeidarpartiet i kjølvatnet av varslar om seksuell trakassering og upassande åtferd. Arbeidarpartiet konkluderte i etterkant med at Giske i fleire av sakene hadde brote dei interne retningslinjene til partiet mot seksuell trakassering.

Giske har beklaga fleire av sakene, men også nekta for innhaldet i enkelte av varsla.

Fredag var han på mediekonferansen Svarte Natta i Tromsø for å delta i ein paneldebatt om metoo.

(©NPK)

Trond Giske møtte pressa etter ein paneldebatt om metoo på mediekonferansen Svarte Natta i Tromsø. Foto: Rune Stoltz Bertinussen / NTB scanpix

ANNONSE
Annonse
ANNONSE
Annonse