Trump: Khashoggi-drapet endrar ikkje USAs tilhøve til Saudi-Arabia

President Donald Trump seier drapet på Jamal Khashoggi ikkje vil føre til noko endring i USAs tilhøve til Saudi-Arabia sjølv om det skulle vise seg at kronprinsen i landet stod bak.

- Det kan godt vere at kronprinsen hadde kjennskap til denne tragiske hendinga. Kanskje hadde han det, kanskje hadde han det ikkje, seier Trump i ei utsegn tysdag.

- Vi vil truleg aldri få vite alle faktum om drapet på Jamal Khashoggi. Uansett behald vi tilhøvet vårt til Saudi-Arabia, seier han vidare.

- USA aktar å halde fram å vere ein trufast partnar med Saudi-Arabia.

Søndag opplyste Trump at han var vorten orientert om innhaldet i lydopptak av drapet på Khashoggi, men at han sjølv ikkje hadde vilja høyre på det. USA fekk lydopptaket av tyrkiske styresmakter, som òg skal ha sendt det til fleire andre land.

Den 59 år gamle saudiarabiske journalisten Jamal Khashoggi vart drepen og truleg partert inne på Saudi-Arbias konsulat i Istanbul 2. oktober. Han arbeidde mellom anna som kommentator for Washington Post og var ein kjend kritikar av Saudi-Arabias kronprins Mohammed bin Salman.

Etter først å ha nekta å ha noko med drapet å gjere, innrømte til slutt saudiarabiske styresmakter at Khashoggi var tekne av dage av ein saudiarabisk dødsskvadron. Dei held likevel fast på at kronprinsen ikkje visste noko om drapsplanane.

Liket av Khashoggi er enno ikkje funne, og ifølgje tyrkiske styresmakter er det grunn til å rekna med at leivningane vart oppløyst i syre for å skjule alle spor.

(©NPK)

President Donald Trump. Foto: AP / NTB scanpix

Annonse
Annonse