Trussamfunn må opplyse om pengestøtte frå utlandet
Regjeringa vil kartlegge kva for trus- og livssynssamfunn som får pengar frå land utan religionsfridom.
- Vi ser med bekymring på at det er norske trus- og livssynssamfunn som blir finansiert av samfunn eller statar som bryt menneskerettane, seier barne- og familieminister Kjell Ingolf Ropstad (KrF) til NRK.
Fredag blir departementsforslaget til ny stortingsmelding om trus- og livssynslov sendt over til Stortinget for behandling. Der foreslår regjeringa at alle trus- og livssynssamfunn som får støtte frå utlandet, skal opplyse om dette i rekneskapane sine. Målet er å kartlegge kor mange det er som får støtte frå land som bryt menneskerettane og ikkje har religionsfridom.
- Då kan ein vurdere til dømes kutt i statsstøtte til dei trussamfunna som får støtte frå statar som bryt menneskerettane, seier Ropstad.
Talsperson for Rabita-moskeen, Basim Ghozlan, som får pengar frå utlandet, meiner at det er positivt at regjeringa no vil kartlegge kvar trussamfunn får pengane sine frå. Han meiner støtta er uproblematisk.
- Utanlandsk støtte er berre problematisk viss givarane set krav om at ein skal gjere ting på ein bestemt måte, og desse krava er i strid med norsk lov eller menneskerettane. Men dette har aldri skjedd, og vil heller aldri skje, seier Ghozlan til NRK.
(©NPK)
Kjell Ingolf Ropstad seier kyrkjelydar som får støtte frå utlandet kan få kutt i statsstøtta. Foto: Carina Johansen / NTB scanpix
