Nordre

Tunge forhold for mange av Noregs hopparar – alle sju vidare til Wisla-premieren

Noreg prega ikkje resultatlistene i kvalifiseringa til det første verdscuprennet i sesongen i hopp. Likevel stiller det norske laget fulltalig i Polen søndag.

Best av dei norske var Halvor Egner Granerud med ein 7.-plass fredag kveld. Asker-hopparen landa på 126 meter, som var det lengste svevet av landslagstrenar Alexander Stöckls sju utvalde.

Neste nordmann var heilt nede på 23.-plass. Den tok verdscupdebutant Sander Vossan Eriksen (19) etter eit hopp på 120 meter. Rett bak følgde Daniel-André Tande, som berre greidde 116 meter under tunge forhold.

Tande opna førre sesong med siger i begge dei to første individuelle renna.

Heller ikkje Robert Johansson fekk enkle vilkår i bakken. 115 meter heldt til ein 30.-plass. Trått var det òg for Marius Lindvik, som frå fjerde avsats måtte nøye seg med stusslege 113,5 meter og ein 39.-plass.

Robin Pedersen og Anders Håre vart nummer 46 og 47. Dei landa på høvesvis 114 og 113 meter. Dei 50 beste kvalifiserte seg til rennet på søndag.

Laurdag står lagkonkurranse på programmet.

(©NPK)

Halvor Egner Granerud var best av dei norske i hoppkvalifiseringa i polske Wisla fredag. Her er han frå eit NM-renn i Midtstubakken i Oslo. Foto: Heiko Junge / NTB

Daniel-André Tande fekk det tungt i kvalifiseringa fredag. Foto: Heiko Junge / NTB

ANNONSE
Annonse
ANNONSE
Annonse