Tusenvis av menn meislar ut Talibans politikk: – Lydnad er det viktigaste

Makthavarane i Kabul har komme med få detaljar om kva som går føre seg på den såkalla jirgaen, ei tradisjonsrik samling av innverknadsrike menn. Det blir den største politiske mønstringa sidan maktovertakinga i fjor.

– Lydnad er det viktigaste prinsippet i systemet. Vi må alle følgje leiarane våre i alle spørsmål på ein oppriktig og sannferdig måte og bør høfleg høyre på dei, sa møteleiar Habibullah Haqqani i opningstalen.

Møtet skjer ei veke etter at eit kraftig jordskjelv tok livet av meir enn 1.000 menneske og gjorde titusenvis heimlause. Jordskjelvet har ytterlegare forverra situasjonen i Afghanistan, som allereie hadde store problem etter at Taliban greip makta i fjor sommar.

Tenestemenn frå USA skal etter planen møte høgtståande Taliban-leiarar i Qatar seinare torsdag. Der skal moglegheita for å gi slepp på nokre av midlane som er frosne etter maktovertakinga, bli diskutert.

Ei kjelde i Taliban fortel til AFP at det blir opna for kritikk av regimet på jirgaen, som skal vare i tre dagar. Spørsmålet om jenters rett til å gå på skule blir truleg eit betent tema.

Meiner kvinner ikkje treng delta

Men ingen kvinner får delta på møtet, seier visestatsminister Abdul Salam Hanafi. Det er det ikkje behov for sidan dei vil vere representerte av dei mannlege slektningane sine, seier han.

– Kvinnene er mødrene og søstrene våre. Vi respekterer dei høgt. Når sønene deira er samla, betyr det at dei også er representerte, seier han.

Sidan Taliban tok makta i august har kvinner vorte nekta undervisning fleire stader, medan andre har mista jobbane sine. Alle kvinner har fått ordre om å dekkje seg til i offentlegheita. Berre ansikta kan synast.

Taliban har også forbode ikkje-religiøs musikk, bruk av menneskeskikkelsar i reklame og beordra TV-kanalane til å stanse visninga av filmar og dramaseriar som viser kvinner som ikkje er tildekte. Menn har fått beskjed om å bruke tradisjonelle klede og la skjegget gro.

Kvar av Afghanistans meir enn 400 distrikt skal sende tre delegatar til jirgaen. Byar, religiøse grupper og andre organisasjonar kan også sende representantar, noko som gjer at over 3.000 blir samla.

Kanskje kjem sjefen

Eit stort spørsmål i afghanske medium er om Talibans øvste leiar, Haibatullah Akhundzada, som ikkje har vorte avfotografert i offentlegheita sidan maktovertakinga, vil dukke opp.

Berre ei handfull uverifiserte lydklipp av talane hans har vorte offentleggjort sidan august. Det er talar han skal ha halde frå Kandahar, Talibans spirituelle heimstad.

I samband med jirgaen er det innført strenge tryggingstiltak i Kabul. Vegar som leier til møteområdet har vorte sperra med vegsperringar.

(©NPK)

Ein Taliban-krigar på vakt i Kabul 18. juni etter at fleire eksplosjonar ramma den afghanske hovudstaden. Foto: Ebrahim Noroozi / AP / NTB