Tusk: Våpenkvile i Syria er eit krav om kurdisk kapitulasjon
Den «såkalla våpenkvila» i Syria er eit krav om kurdisk kapitulasjon, seier EU-president Donald Tusk.
Forholdet til Tyrkia var eitt av dei utanrikspolitiske temaa som vart diskuterte på EU-toppmøtet i Brussel.
Medan stats- og regjeringssjefane «noterte seg» at USA og Tyrkia har kunngjort eit fem dagar langt opphald i kamphandlingane, gjekk altså Tusk betydeleg lenger i kommentaren sin etter møtet. Han meiner det ikkje er snakk om noka reell våpenkvile.
- Det er eit krav til kurdarane om å kapitulere, sa Tusk då møtet vart runda av fredag.
EU-leiarane gjentok torsdag fordømminga av militæroffensiven til NATO-medlem Tyrkia mot kurdarane i Nord-Syria. I praksis gjentok dei dermed det utanriksministrane til medlemslanda sa tidlegare i veka. Rådet gjentok òg at EU meiner prøveboringa til Tyrkia utanfor Kypros er eit brot på folkeretten.
(©NPK)
Avtroppande EU-president Donald Tusk meiner den varsla våpenkvila i Tyrkia i realiteten er eit krav om kapitulasjon. Foto: Olivier Matthys / AP / NTB scanpix
