TV 2 får konsesjon som kommersiell allmennkringkastar

TV 2-sjef Olav Sandnes seier til eigen kanal at dette er ein gledesdag.

- Det har vore eit langt løp, og det har ei naturlege forklaring, men i dag er vi først og fremst veldig, veldig glade, seier han.

Behandlinga av søknaden frå TV 2 har blitt utsett og forseinka, men onsdag føremiddag underteiknar Sandnes og kulturminister Trine Skei Grande (V) avtalen i Media City i Bergen. Avtalen inneber at TV 2 vil vere kommersiell allmennkringkastar dei neste fem åra.

TV 2 var einaste søkjar på utlysinga som kommersiell allmennkringkastar då fristen gjekk ut i september i fjor. I utlysinga blei det klart at staten vil kompensere TV-kanalen som får oppdraget med inntil 135 millionar kroner per år i fem år. Totalt kan TV 2 altså få 675 millionar kroner i avtaleperioden.

Utlysingsteksten inneheldt eit eksplisitt krav om at hovudredaksjonen og sentral nyheitsredaksjon skal vere lokalisert minst ti mil utanfor Oslo, men TV 2 har argumentert mot dette kravet søknaden.

Utlysinga inneheldt også krav om å levere riksdekkjande nyheitssendingar, tilbod til barn og unge, og norsk film- og TV-drama. Norskspråklege program må utgjere minst 50 prosent av sendetida, ifølgje utlysinga i fjor.

Detaljane i den nye avtalen som blir inngått onsdag er førebels ikkje kjende.

Foto: Emil Weatherhead Breistein / NTB scanpix