Tybring-Gjedde: - Hadde ikkje klart oss utan dei frivillige

- Eg er ekstremt imponert over alle dei frivillige som er tilgjengelege, øver og trenar, seier statsråd for samfunnstryggleik i Justis- og beredskapsdepartementet, Ingvil Smines Tybring-Gjedde til NTB.

Mens det etter kvart tikkar mot vinterferie i Noreg, er det fleire tusen frivillige som i desse dagane øver og trenar på situasjonar som kan oppstå dei neste vekene.

Fredag fekk Tybring-Gjedde ein demonstrasjon av korleis dei frivillige organisasjonane handlar når ulykka er ute. Øvinga vart halde på Sognsvann utanfor Oslo.

- Mens alle andre har fri og er saman med familiane sine, bruker dei frivillige tida på å vere førebudde viss uhellet er ute. Dei er veldig, veldig viktige for oss. Eg vil takke dei alle, seier tryggingsministeren.

Bidra til utvikling

- Vi går inn i to veker med vinterferie og beredskapsorganisasjonane førebur seg ekstra. Dette gjeld særleg dei meste populære utfartsstadene og områda som er mest utsett for skredfare, seier Bente Asphaug, dagleg leiar i Frivillige Organisasjoners Redningsfaglige Forum (FORF).

FORF representerer frivillige ressursar i redningstenesta i Noreg. Formålet er å koordinere innspel til nasjonale styresmakter og bidra til fagleg utvikling av tenesta.

Røde Kors Hjelpekorps (RKH), Norsk Folkehjelp sanitet (NFS), Norske Redningshunder (NRH), Norsk Grotteforbund, Norsk Radio Relæ Liga (NRRL), NAK flyteneste og Speiderens beredskapsgrupper er medlemmer av FORF.

Asphaug seier fleire av gruppene kjem til å ha beredskap 24 timar i døgnet gjennom heile vinterferien og er klar til å rykke ut på kort varsel.

- Kle deg etter forholda

Til dei som skal ut på ski eller gå i fjellet dei kommande vekene, har Tybring-Gjedde desse oppfordring:

- Alle har ansvar for sin eigen tryggleik. Vêret kan snu fort, så det er viktig å vere obs heile tida. Ikkje gå i lehellingar og følg med, for det er snøskredfare i fjellet. Kle deg etter forholda og ha med mat og drikke, og dessutan ekstra klede. Og følg fjellreglane!

Ho seier at dei som køyrer i puddersnø, må vere særleg aktsame.

- Ein kan tru ein har kontroll, men det er ikkje alltid sånn. Det er mange av ulykkene som skjer i skianlegg, og det er ein grunn til at ein der har sett opp skilt for der ein skal køyre. Det er veldig viktig å bruke hovudet.

(©NPK)

Minister for samfunnstryggleik Ingvil Smines Tybring-Gjedde (Frp) får ein gjennomgang av dei frivillige under ei øving på Sognsvann i Oslo.
Foto: Vidar Ruud / NTB scanpix

Ingvil Smines Tybring-Gjedde under øvinga ved Sognsvann fredag. Norske Redningshunder (NRH) er ein av fleire som deltar i frivilligarbeidet i vinterferien.
Foto: Vidar Ruud / NTB scanpix

Minister for samfunnstryggleik Ingvil Smines Tybring-Gjedde (Frp) er full av lovord om dei frivillige som skal sørgje for tryggleiken i vinterferien. Foto: Vidar Ruud / NTB scanpix

Samfunnstryggingsminister Ingvil Smines Tybring-Gjedde (Frp) får ein demonstrasjon av dei frivillige redningsressursane under ei øving ved Sognsvann i Oslo. Foto: Vidar Ruud / NTB scanpix