Tysk elitesoldat hadde våpenlager i hagen
Ein tysk elitesoldat innrømmer at han gjennom fleire år har bygd opp eit lager av våpen i sin eigen hage. Våpena kom frå lagera til forsvaret.
Den 45 år gamle mannen, som blir mistenkt for å ha høgreekstreme sympatiar, seier han brukte våpena til trening fordi det ofte var mangel på utstyr. I retten i Leipzig forklarte han at våpena i auga hans ikkje lenger var eigna til bruk i forsvaret.
Soldaten, som er frå landsbyen Collm aust i landet, er tiltalt for brot på våpenlova og lova som kontrollerer krigsvåpen.
I ein rassia mot huset hans i mai i fjor, fann politiet i tillegg til ei rekkje skytevåpen og våpendelar òg 2 kilo dynamitt, fleire tusen patroner, ein armbrøst og ein røykgranat. Blant våpena var det eit AK-47 automatgevær, også kjent som ein kalasjnikov. Våpena var gravne rundt 40 centimeter ned i bakken.
Mannen vart overvakt i tre år før den militære etterretningstenesta gav ordre om ransakinga. Det vart òg funne høgreekstremt materiale i form av blad, klistremerke og ei songbok frå SS.
Saka støttar opp om mistankane om at store mengder våpen og ammunisjon er stole frå landets spesialstyrkar.
Forsvarsminister Annegret Kramp-Karrenbauer oppløyste i juni i fjor ei avdeling innan dei tyske spesialstyrkane etter at det vart kjent at fleire av medlemmer hadde høgreekstreme sympatiar.
(©NPK)
