Tyskland betaler over 3 milliardar kroner for å stengje kolkraftverk
Tyske styresmakter kunngjorde tysdag ei løyving på 3,36 milliardar kroner i kompensasjon til kraftselskap for å stengje kolkraftverk frå og med nyttår.
Frå 1. januar vil selskapa som eig dei elleve kraftverka, ikkje lenger få selje straumen som dei produserer. Tyskland skal stengje ned heile kolindustrien sin innan 2038 som ein del av tiltaka for å kutte tyske klimautslepp. Per i dag blir ein tredel av straumen i Tyskland produsert med kolkraftverk.
Dette er berre den første av fleire rundar der selskap kan søkje om slike utbetalingar. Fleire store straumselskap, blant dei svenske Vattenfall, søkte om å få denne typen kompensasjon. I Vattenfalls tilfelle må dei no stengje kolkraftverket Moorburg utanfor Hamburg.
(©NPK)
