U21-landslaget slo Tyrkia

Noreg gjekk opp i føringa allereie etter tre minutt, då Sarpsborg-spelaren Tobias Heintz sette inn det første U21-målet. Då kampen var spelt 22 minutt av kampen dobla Nico Mickelson leiinga, men tyrkarane reduserte til 1-2 fire minutt seinare.

Med eit drøss av nye spelarar gjekk Noreg opp til 3-1 ved kaptein Birk Risa halvveges i andre omgang, før tyrkarane endå ein gong reduserte til 2-3 kvarteret før slutt. Fleire mål vart det ikkje, og Leif Gunnar Smeruds mannskap avslutta La Manga-opphaldet på best mogleg måte.

Mange debutantar

Eit nykomponert U21-landslaget starta kampen med fire debutantar. Julian Faye Lund (Levanger), Ulrik Fredriksen (Sogndal), Felix Horn Myhre (Vålerenga) og Emil Bohinen (Stabæk) fekk alle den første kampen sin i fråvær av dei store stjernene.

Ytterlegare fire spelarar fekk debuten sin i andre omgang. Christian Haug, Markus Solbakken, Eman Markovic og Tobias Svendsen kom inn og bidrog til ei god avslutning på året.

Noreg stilte utan Martin Ødegaard og Sander Berge, som var med A-landslaget på Kypros. Heller ikkje Erling Braut Haaland var med i troppen.

- Vi byggjer eit nytt lag og denne samlinga har vore eit fint høve til å sjå på nye spelarar. Det er knallhard konkurranse om plassane no. Det er sånn det skal vere, sa landslagstrenar Leif Gunnar Smerud til fotball.no før kampen.

Godkjent statistikk

Med sigeren går Smeruds lag gjennom 2018 med eitt tap på seks kampar.

Berre Tyskland, som vann gruppa i EM-kvalifiseringa, makta å slå det norske mannskapet i år. Noreg slo Israel, Aserbajdsjan i tillegg til Tyrkia, og spelte uavgjort mot Italia (treningskamp) og Aserbajdsjan.

U21-landslaget hamna ti poeng bak Tyskland i EM-kvalifiseringa og blir ikkje å sjå i EM neste år. Det gjer heller ikkje Tyrkia, som enda bak Belgia og Sverige i kvalifiseringsgruppa si.

(©NPK)

Dennis Tørset Johnsen og U21-landslaget avslutta 2018-sesongen med siger over Tyrkia.
Foto: Geir Olsen / NTB scanpix