Ukraina har vedtatt omstridd språklov
Nasjonalforsamlinga i Ukraina har vedtatt ein omstridd språklov som skal bidra til auka bruk av ukrainsk framfor russisk.
Russland reagerer kraftig på vedtaket torsdag.
- Dette er ein skandaløs lov, han kan ikkje kallast noko anna, seier talskvinne for det russiske utanriksdepartementet, Maria Zakharova. Ho peiker på at loven vil føre til endå meir splitting i Ukraina og gjere det vanskelegare å få slutt på krigen.
Loven pålegg alle ukrainarar å snakke ukrainsk. Offentlege tenestemenn, legar, lærarar og advokatar risikerer bøter viss dei ikkje bruker ukrainsk. Det blir òg fleire ukrainsk-språklege TV- og radioprogram framfor program på russisk.
Avtroppande president Petro Porosjenko kallar den nye lova «ei historisk hending».
Etterfølgjaren Volodymyr Zelenskyj, som sjølv er russiskspråkleg, seier likevel at han vil gjennomgå loven grundig når han overtar makta om eit par månader.
Ukrainsk og russisk liknar, og dei fleste ukrainarar kan snakke russisk. I dei austlege delane av landet, der separatistar har hatt kontrollen sidan 2014, dominerer russisk. Også i sør er russisk det dominerande språket. Vest i landet bur det dessutan både ungarskspråklege og rumenskspråklege minoritetar.
Analytikarar meiner at den nye loven vil vere ei utfordring for Zelenskyj, som ofte snakkar russisk på offentlege arrangement.
(©NPK)
Tilhengarar av Ukrainas avtroppande president Petro Porosjenko i Kiev måndag. Porosjenko er svært fornøgd med at nasjonalforsamlinga har vedtatt ein ny språklov, som krev at alle ukrainarar snakkar ukrainsk. Hans russiskspråklege etterfølger Volodymyr Zelenskyj er truleg mindre fornøgd. Foto: Vadim Ghirda / AP / NTB scanpix
