Ukrainsk topplag krast ut mot Fifa – vil ha ein halv milliard for tapte overgangssummar

Sjakhtar Donetsk krev over 500 millionar kroner frå Fifa. Årsaka er at utanlandske spelarar kan halde seg borte frå den ukrainske klubben det neste året.

Det fortel Sjakhtar-direktør Sergej Palkin til nettstaden The Athletic. Erstatningskravet på 50 millionar euro kjem som følgje av avgjerda Det internasjonale fotballforbundet (Fifa) tok 21. juni.

Då fekk utanlandske spelarar og trenarar i ukrainske klubbar grønt lys til å oppheve kontraktane sine mellombels fram til 30. juni 2023. Russlands krigføring i Ukraina låg bak vedtaket.

Nyheita kom som eit sjokk på Sjakhtar-leiinga. Dei hadde planar om å selje fleire spelarar for fleire titals millionar euro, men over natta kollapsa alle moglege avtalar. Interesserte klubbar kunne i staden vente og hente dei på fri overgang.

– Alle trur vi er ein stor fotballfamilie. Denne avgjerda set ein strek over det slagordet. Vi er ikkje ein samla fotballfamilie, for ingen bryr seg om ukrainske klubbar. Det er veldig synd. Fifa bryr seg ikkje om oss, seier Palkin.

Han sende førre månad eit brev til Fifa-president Gianni Infantino og peika på konsekvensane. «På grunn av Fifas avgjerd har Sjakhtar mista eit høve for overgangar for fire spelarar til ein verdi av 50 millionar euro», skreiv han, ifølgje The Athletic.

Hittil har ikkje Sjakhtar fått den responsen dei håpa på. Klubben varslar rettslege steg, og han vil også anke saka til Den internasjonale valdgiftsretten for sport (CAS) for å få gjort om avgjerda som fritt lèt utanlandske spelarar forlate ukrainsk fotball.

(©NPK)

Sjakhtar Donetsk varslar erstatningssøksmål mot Det internasjonale fotballforbundet (Fifa). Her er Fifa-president Gianni Infantino frå 2017. Foto: Torstein Bøe / NTB

ANNONSE
Annonse