USA unngår enorm jernbanestreik
Ein avtale mellom fagforeiningar og arbeidsgivarar i jernbanesektoren i USA gjer at landet unngår ein streik som kunne kosta 2 milliardar dollar dagen.
Ein førebels avtale mellom tolv fagforeiningar og fleire jernbaneselskap sørgjer for at ein unngår ein streik som ville omfatta over 100.000 arbeidstakarar. I staden seier president Joe Biden at jernbanearbeidarane ligg an til høgare lønn, betre arbeidsforhold, og betre helseforsikring.
– Alt det er velfortente sigrar. Det er også ein siger for jernbaneselskapa som får moglegheita til å tilsetje og behalde fleire arbeidarar i ein industri som framleis vil vere ein sentral del av den amerikanske økonomien i mange tiår framover.
Avtalen vart kunngjord kort tid etter 5.00 Washington-tid torsdag (11.00 norsk tid) etter forhandlingar som varte heile natta. Streiken, som kunne byrja allereie fredag, ville fått store konsekvensar for både godstrafikken og lokal passasjertrafikk i store delar av USA.
Godstog med mat og drivstoff og pendlartog kunne vorte ståande, og 2 milliardar dollar kunne gått tapt kvar dag. Ein stor del av godstrafikken går på jernbanen i USA, og industrien er svært avhengig av godstog. I tillegg ville streiken vorte ein verkebyll for Demokratane før mellomvalet i november.
(©NPK)
Godstog over heile USA, som her i Los Angeles, kunne vorte ståande stille frå fredag om ikkje fagforeiningar og arbeidsgivarar hadde vorte samde om ein avtale. Foto: Ashley Landis / AP / NTB
