USAs forsvarsminister på umeldt besøk i Afghanistan

USAs fungerande forsvarsminister Patrick Shanahan er på eit umeldt besøk i Kabul, melder Reuters. Turen er den første til utlandet som minister.

Shanahan landa i det krigsherja landet måndag.

- Det er viktig at den afghanske regjeringa, som hittil har vore halden utanfor, deltek i fredsforhandlingane for Afghanistan, sa Shanahan, ifølgje nyheitsbyrået Reuters. Han la til at USA har viktige tryggingsinteresser i regionen.

President Donald Trump varsla før jul at han ville hente heim rundt halvparten av USAs 14.000 soldatar frå Afghanistan, og kort tid etter vart det kjent at USA og Taliban hadde innleidd forhandlingar i Qatar.

Afghanske styresmakter har lenge ønskt å forhandle med Taliban, men opprørarane har nekta og gjort det klart at dei berre vil snakke direkte med USA, ikkje via «løpegutter», som dei reknar den afghanske regjeringa for å vere.

Shanahan har inga militærerfaring, men han har sidan juli 2017 vore USAs viseforsvarsminister. Før det var han over 30 år i flyfabrikanten Boeing. Han tok over som forsvarsminister etter Jim Mattis, som i desember vart tvinga til å gå av to månader tidlegare enn planlagt etter usemje med Trump.

(©NPK)

Patrick Shanahan tok over som forsvarsminister etter Jim Mattis. Turen til Afghanistan er den første utanlandsturen hans i ministerposisjonen. Foto: Evan Vucci / AP / NTB scanpix.

ANNONSE
Annonse