Usikkert om Tutta kjem tilbake i verdstoppen

- For å seie det sånn, eg gidd ikkje å komme tilbake halvvegs. Dersom eg skal satse igjen, så er det fordi eg skal vere betre enn nokon gong. Eg er perfeksjonist, og kan ikkje gjere dette halvvegs, seier Tutta til VG.

I mange år var Pettersen i den ypparste verdseliten. I alt har ho vunne 15 LPGA-turneringar, og for fem år sidan var ho rangert så høgt som nummer to i verda.

Denne sesongen tok Tutta eit steg til sida for å bli mamma. 8. august vart ho og ektemannen Christian Ringvold foreldre for første gong. Oslo-golfaren har begynt å trene seg opp igjen etter fødselen.

- Akkurat no har eg nettopp fått tilbake følelsen av å eige min eigen kropp igjen. Eg har begynt på den fysiske biten med å komme i form, men golfmessig ventar eg litt, seier Pettersen.

Ho har ikkje slått ein golfball sidan februar.

- Så det er litt av ein jobb som må gjerast dersom eg skal tilbake, seier Tutta, som for tida er heime i Noreg. Ho bur til vanleg i Orlando i Florida.

(©NPK)

Suzann Pettersen nyt den nye rolla som mamma. Golfstjerna er usikker på om ho kjem tilbake i verdstoppen igjen. Foto: Heiko Junge / NTB scanpix