Vaksinesamarbeidet Covax har nådd innsamlingsmålet
Covax har nådd innsamlingsmålet på 9,6 milliardar dollar. Pengane skal sikre vaksinar til 30 prosent av befolkninga i låg- og mellominntektsland.
– Ein milepæl som viser at ei meir rettferdig fordeling er mogleg. Målet er likevel først nådd når folk er vaksinerte og også fattige land kan planleggje gjenopning, seier utviklingsminister Dag-Inge Ulstein (KrF) i ei pressemelding.
Covax har som mål å levere 1,8 milliardar vaksinedosar til 92 låg- og mellominntektsland innan 2022. Så langt har samarbeidet fordelt 81 millionar vaksinar i 129 land. Covax er del av pandemikoalisjonen ACT Accelerator, som blir leidd av Noreg og Sør-Afrika.
Noreg har overført opsjonar på 1,7 millionar vaksinedosar gjennom Covax. I tillegg bidreg Noreg med 1,3 milliardar kroner som gjer at samarbeidet kan levere rundt 25 millionar vaksinedosar til låg- og mellominntektsland.
(©NPK)
Vaksinesamarbeidet Covax, som skal sikre vaksinar til låg- og mellominntektsland, har nådd innsamlingsmålet. Foto: Sunday Alamba / AP / NTB