Nordre

Varm avskjed med skikongen Gjermund Eggen: - Ein av dei aller største

Familie, venner og idrettsprofilar tok eit siste farvel med den folkekjære langrennslegenda Gjermund Eggen i Engerdal kyrkje.

Kyrkja med sine 250 sitteplassar var fylte til randa i vårsola. Dei som ikkje fekk plass på kyrkjebenkene, følgde med via storskjerm i Engerdal Samfunnshus nokre få stavtak unna. Også der talde forsamlinga fleire hundre personar.

Gjermund Eggen døydde måndag 6. mai etter kort tids sjukeleie. Han vart 77 år gammal.

Med sine tre VM-gull i Holmenkollen i 1966 sikra engerdølen seg ein plass i den norske idrettshistoria for alltid. Samtidig vart skikongen umåteleg populær på grunn av sin jordnære veremåte og sitt vinnande vesen.

Den siste skituren

Onsdag vart idrettsmannen og mennesket Eggen minna i heimbygda der han budde heile livet. Soknepresten i Engerdal, Svein Olav Angard Hovde, forretta under gravferda. Han teikna eit bilde av ein høgt respektert person ingen hadde noko vondt å seie om.

Kona Anne heldt òg tale til mannen ho hadde vore gift med i nesten 50 år.

- Vi hadde håpt at dette skulle gå bra, og at du skulle overvinne sjukdommen. Slik gjekk det ikkje, men eg er så takknemleg for at du slapp å ligge og ha det vondt. Til sommaren skulle vi feira gullbryllaup, 50 år, men det blir ikkje sånn. Men eg har så mange gode minne å tenke tilbake på, sa ho.

Vidare fortalde ho at Eggen var til stades på sitt aller siste skiarrangement så seint som i Holmenkollen i mars. Der delte han ei spesiell oppleving med ei anna langrennslegende, Oddvar Brå.

- Eg gjekk saman med Gjermund på den siste skituren hans. Turen varte i 100 meter nedanfor Koparhaughytta. Han gjekk føre, eg gjekk bak, sa Brå til NTB før gravferda.

Rockestjerne

Eggens tre barn Gard, Mette og Ann Kristin trekte fram evna til å fortelje «røvarhistorier» då dei snakka i kyrkja.

Artistane Jørn Hoel og Hanne Krogh, som begge var personlege venner av Eggen, stod for dei musikalske innslaga. Krogh framførte mellom anna «Jeg snører min sekk».

Skipresident Erik Røste sette ord på Eggens tyding i skihistoria.

- Ved Gjermund Eggens bortgang har Noreg mista ein av sine aller største og mest folkekjære skiløparar gjennom alle tider, sa han.

Det har vorte sagt om Eggen at han var nesten like populær som The Beatles, då han var på høgda av karrieren etter VM-suksessen i 1966. Det blir sagt at opp mot 70.000 menneske har komme i busslaster for å besøkje skikjendisen og kona Anne i heimen deira på Hylleråsen opp gjennom åra. Gjestfridommen dei to viste vart eit naturleg tema då livet til langrennslegenda skulle samanfattast i kyrkja.

- Gjermund har vore guide, og Anne har tatt imot gjester med kaffi og kaker i heimen og gitt folk tilbakeblikk, bode på seg sjølv og delt av verdiane sine og livserfaringar, alltid med glimt i auget og ein god replikk, livsglede og humor, sa sokneprest Hovde.

Lokalpatrioten Eggen brukte alle høve og alle besøk til å snakke varmt om heimbygda.

Sjarmør og forbilde

Med Eggens bortgang er halvparten av laget frå VM-stafetten i 1966-VM i Oslo borte. Harald Grønningen døydde sommaren 2016. Ole Ellefsæter og Odd Martinsen er igjen.

- Gjermund var sjarmøren. Han var veldig sosial og ein fornuftig og fin person, sa Ellefsæter til NTB då han kom til kyrkja onsdag.

Odd Martinsen omtalte den mangeårige lagkameraten og vennen som eit forbilde for alle.

- Han var ein omgjengeleg person, munter, replikkdyktig og kunne vere ein skøyar. Samtidig var han kjenslevar og var der for meg og andre når vi hadde problem, sa han.

Eggen, som fekk tilnamnet «Engerdalsprinsen», gjorde med gulla i 1966 slutt på ei mangeårig norsk gulltørke i VM-samanheng. Han vart ståande utan OL-medalje i den innhaldsrike karrieren, men fekk ei rekke utmerkingar for innsatsen i langrennssporet.

Utanfor kyrkja han vart gravlagd frå onsdag har han fått sin eigen statue.

(©NPK)

Ei fullsett Engerdal kyrkje tok avskjed med Gjermund Eggen onsdag. Foto: Vidar Ruud / NTB scanpix

Hanne Krogh og Jørn Hoel song i Engerdal kyrkje. Foto: Vidar Ruud / NTB scanpix

Ole Ellefsæter mintest sin tidlegare lagkamerat. Foto: Vidar Ruud / NTB scanpix

Odd Martinsen var til stades i Engerdal kyrkje. Bak står Inge Andersen. Foto: Vidar Ruud / NTB scanpix

Gjermund Eggen vart gravlagt frå Engerdal kyrkje. Foto: Vidar Ruud / NTB scanpix

Svein Olav Angard Hovde forretta i Engerdal kyrkje. Foto: Vidar Ruud / NTB scanpix

ANNONSE
Annonse
ANNONSE
Annonse