Vedum forsvarer budsjettjustering
Kor mykje pengar kan sjukehus, politi og Forsvaret bruke når finansministeren vil justere budsjettet? spør Høgre. Justering vil gi tryggleik, svarer Vedum.
Finansminister Trygve Slagsvold Vedum (Sp) vart i Stortinget utfordra rundt den varsla endringa.
Før helga kunngjorde han at prisveksten er vesentleg høgare enn det som vart lagt til grunn for budsjettet for 2023. Det vil derfor komme nye anslag og justeringar i revidert budsjett i mai.
Ei slik justering er uvanleg, påpeika Høgre, som gav uttrykk for at regjeringa var bakpå når dei først no oppdaterer anslaget.
Dei lurer på kva offentlege verksemder skal ta utgangspunkt i – det budsjettet som er vedteke i Stortinget, eller den varsla justeringa.
Er det nokon spesiell grunn til at finansministeren og regjeringa ikkje kom med oppdaterte anslag då vi hadde budsjettet til behandling, og då alle andre kom med høgare anslag for prisveksten, spurde Helge Orten (H).
Vedum forsvarte grepet. Han viste til at prisveksten har vore uvanleg høg og at svingingane har vore større enn vanleg. Justeringa skal gi tryggleik til offentlege verksemder, understreka han.
– Vi vil gi tryggleik til det aktivitetsnivået som Stortinget la opp til før jul. Det skal haldast. Verken meir eller mindre. Det er ingen grunn til å ha lågare aktivitet i politi, sjukehus eller forsvar fordi prisveksten har vore høgare, svarte han.
(©NPK)
Finansminister Trygve Slagsvold Vedum (Sp) på talerstolen under Stortingets munnlege spørjetime. Foto: Rodrigo Freitas / NTB
