Vel 9.000 familieinnvandrarar hittil i år - 3.000 færre enn i fjor

Utlendingsdirektoratet (UDI) har så langt i år innvilga 9.235 søknader om familiegjenforeining i Noreg for borgarar frå land utanfor EU og EØS-området.

Dette er ein nedgang frå 12.331 familieinnvandringsløyve til same tid i fjor.

UDI-tala omfattar også etablering med ein familiemedlem i Noreg, altså ekteskap.

Personar med indisk og syrisk statsborgarskap toppar lista med høvesvis 836 og 835 familieinnvandrarar i dei ti første månadane.

Ifølgje Statistisk sentralbyrå bur det snautt 16.000 personar i Noreg med innvandrarbakgrunn frå India. Rundt ein tredel i denne gruppa er fødde i Noreg. Til samanlikning bur det omkring 30.000 personar med bakgrunn frå Syria i Noreg, av dei er 2.500 fødde i Noreg.

I alt er det innvilga familieinnvandring for personar frå 100 ulike land, men talet er tresifra for berre 22 land.

Dei to største innvandrargruppene i Noreg frå land utanfor EU og EØS-området er somaliarar med 42.500 personar og pakistanarar med 37.500 personar. Så langt i år har 382 somaliske borgarar og 269 pakistanarar fått innvilga familieinnvandring til Noreg.

(©NPK)

UDI har sagt ja til 9.235 familieinnvandrarar i år. Foto: Håkon Mosvold Larsen / NTB scanpix