Verdscupfasit for para-alpinist Pedersen: Seks 1.- og seks 2.-plassar
Med andreplass torsdag fullførte para-alpinisten Jesper Saltvik Pedersen første del av verdscupen. Han har vunne 6 av 12 renn og teke like mange andre plassar.
Saman med Jeroen Kampschreur dominerer han klassen for sitjande. Torsdag leidde Pedersen etter første omgang av slalåmrennet i Kranjska Gora 1,11 sekund føre nederlendaren, men Kampschreur slo tilbake i finaleomgangen og vann samanlagt med 0,35 sekund.
Frå Pedersen var det 2,62 sekund ned til Takeshi Suzuki frå Japan på tredjeplass.
– Det har vore ein utruleg bra start på sesongen, men eg har framleis litt å jobbe med, spesielt i storslalåm. I dag leidde eg etter første omgang, men gjorde nokre feil i andreomgangen som gjorde at det ikkje vart siger. Det er utruleg tett, og det er kult at det er så bra konkurranse, sa Pedersen.
Verdscupen held fram med ein ny runde i Russland i februar og med prøve-VM i Hafjell i mars.
(©NPK)
Jesper Saltvik Pedersen tok seks førsteplassar og seks andreplassar på dei tolv første renna i verdscupen. Foto: Thomas Brun / NTB scanpix
