Verdseinarane Mol og Sørum starta med to sigrar i Las Vegas
Anders Mol og Christian Sørum vann sine første gruppekampar i verdsserieturneringa i sandvolleyball i Las Vegas og gjekk rett til 2. runde av utslagsrundane.
Nordmennene har ein fantastisk sommar bak seg og toppar verdsrankinga. I semifinalen i gruppe B slo dei amerikanarane Jeremy Casebeer/William Reid Priddy 2-0 (21-12, 21-12) på 33 minutt.
I gruppefinalen natt til fredag norsk tid vart det 2-1-siger over nederlendarane Jasper Bouter/Christiaan Varenhorst. Dei tapte første sett 18-21, men vann dei to neste 21-18, 15-9.
Dei to sigrane gjer at det norske paret unngjekk den første utslagsrunden og gjekk direkte til 2. runde i hovudrunden. Det er ikkje avgjort kven dei møter og når kampen går.
Ingrid Lunde og Oda Johanne Ulveseth tapte sin første kamp i gruppespelet 0-2 (16-21, 18-21) mot sveitsiske Tanja Hüberli og Nina Betschart. Fredag kveld møter dei det kinesisk paret Wang Xinxin og Xia Xinyi. Den kampen blir avgjerande for det vidare utfallet av turneringa for deira del.
Turneringa i Las Vegas varer til søndag. Den blir arrangert i fellesskap av FIVBs verdsserie og USA-touren p1440.
(©NPK)
