VG: Tilsette ved Nav Årstad har fått drapstruslar i årevis
Fleire tilsette på Nav Årstad i Bergen, der to tilsette vart knivstukne måndag, har gjennom fleire år fått grove og alvorlege truslar frå brukarar, skriv VG.
Avisa har gått gjennom rettsdokument der ei rekkje personar er dømde og tiltalte for truslar mot Nav-tilsette på kontoret på Årstad dei siste åra. Fleire av sakene gjeld drapstruslar, andre truslar og krenkjande åtferd.
Ein mann i 30-åra vart måndag formiddag arrestert etter å ha knivstukke to tilsette ved Nav-kontoret Årstad. Ei kvinne i slutten av 50-åra døydde av skadane, medan ei kvinne i midten av 30-åra er lettare skadd.
Både arbeidsminister Torbjørn Røe Isaksen (H) og arbeids- og velferdsdirektør Hans Christian Holte har måndag sagt at Nav på nytt må gå gjennom tryggleiken rundt kontora sine.
(©NPK)
Væpna politi rykte ut til eit Nav-kontor på Danmarksplass i Bergen måndag formiddag. To personar blei knivstukne. Foto: Marit Hommedal / NTB
