Solskjær på plass i Manchester, retur 8.178 dagar etter at eventyret starta

Fleire medium, også BBC Manchester melde at nordmannen hadde komme. Han kom med eit privatfly som tok av i Kristiansund, og det taksa til den private delen av Manchesters internasjonale flyplass.

Solskjær var på dei flestes lepper. På SAS-avgangen frå København til Manchester vart dei reisande oppdatert av kapteinen før avgang med: - Det er nyheiter. Ole har komme for å ta over.

Solskjær skal leie United-treninga torsdag og møter sannsynlegvis media fredag.

Tilbake

Solskjær gjer eit eventyraktig comeback i Manchester United. Vel 22 år etter at han vart kjøpt av Alex Ferguson, overtek han som manager i klubben.

Han erstattar José Mourinho med umiddelbar verknad, leier høgst sannsynleg treninga torsdag og laget i kampen mot den gamle arbeidsgivaren sin Cardiff laurdag. Mike Phelan blir Solskjærs assistent.

- United har ein spesiell plass i hjartet mitt. Det er fantastisk å vere tilbake i denne rolla. Eg ser fram til å jobbe med den talentfulle spelarstallen vi har og alle andre i klubben, seier Solskjær til Uniteds nettside.

Solskjær har i utgangspunktet jobben ut denne sesongen. Han går inn i ein klubb som er heilt avhngt i toppkampen i Premier League og som møter Paris Saint-Germain i meisterligaen i februar.

Dei fleste ekspertane er samstemde om at Solskjærs sjansar til å halde på jobben på permanent basis ikkje er særleg store. Fleire store namn, blant andre Mauricio Pochettino og Zinédine Zidane, er peika på som heitast til å ta jobben frå juni av.

Solskjær har eit svært overkommeleg kampprogram, med eitt unntak (bortekamp mot Tottenham), fram til 9. februar. 12. februar kjem PSG til Manchester i det som blir den andre store testen for Solskjær.

Onsdag var det 8.178 dagar sidan Solskjær vart United-spelar. Det skjedde 29. juli 1996 etter at angriparen vart flogen frå Molde til Manchester i flyet til Kjell Inge Røkke.

Yndling

Solskjær vart raskt ein yndling på Old Trafford og scora 18 ligamål i den første sesongen sin i Manchester. Han fekk tilnamnet «The Baby-faced Assassin» på grunn av sin guteaktige utsjånad.

Nordmannen hadde ofte ei rolle som superreserve, men han valde å bli i klubben. Solskjær fekk fleire tilbod om å byte arbeidsgivar. Han var lojal mot United heilt til ein kneskade stoppa han i slutten av august 2007.

Høgdepunkta i Solskjærs elleve sesongar lange karriere som United-spelar er svært mange. Han vart matchvinnar i Champions League-finalen i 1999 då United slo Bayern München i ein svært dramatisk kamp.

I 1999 scora Solskjær fire mål som innbytar i ein kamp mot Nottingham Forest.

Solskjærs fasit vart 126 mål på 366 kampar for United. Han gjekk glipp av nesten to heile sesongar på grunn av skade.

2. august 2008 spelte han sin testimonialkamp på Old Trafford. Dagen før skreiv ein av Englands mest anerkjente fotballskribentar, Henry Winter, dette:

- Det vil ikkje vere eit tørt auge på Old Trafford når Ole Gunnar Solskjær - ein rollemodell i fotballen, eit United-ikon og mannen som putta ballen i målet bak tyskarane - kjem på banen for siste gong.

Etter Cardiff-kampen laurdag speler United mot Huddersfield 2. juledag og Bournemouth fire dagar seinare. Begge går på Old Trafford.

(©NPK)

Ole Gunnar Solskjær tar over Manchester United. Foto: Trond Reidar Teigen / NTB scanpix

Ole Gunnar Solskjær med Manchester United-fans i februar 1999. Foto: Espen Hartvig, NTB scanpix