Zelenskyj fordømmer angrep på kulturhus
Ukrainas president fordømde fredag eit angrep på det nyleg renoverte kulturpalasset i Lozova i nærleiken av Kharkiv, som han skuldar Russland for å stå bak.
Ein video av angrepet viser ein kraftig eksplosjon, svart røyk som omhyllar kulturpalasset og bygningsrestar som blir slyngde til vêrs. Bygningen ligg like ved eit område som er tett med bustadblokker, og både bilar og fotgjengarar er på veg forbi.
Ein lokal helsetenestemann, Viktor Zabasjta, seier at sju menneske vart såra i angrepet, blant dei ein elleve år gammal gut.
Videoen som ser ut til å vere henta frå eit overvakingskamera og har tidskode 20. mai, er verifisert av Faktisk Verifiserbar.
– Okkupantane har peika ut kultur, utdanning og humanitet til fiendane sine. Og dei sparer ikkje på bomber og rakettar, sa Zelenskyj.
Faktisk Verifiserbar skriv at den ukrainske telegram-kontoen melder at bygget vart treft av eit missil frå stor høgd i vest, medan den russiske telegram-kontoen seier at det var eit kryssarmissil som vart skoten ut frå eit langtrekkjande bombefly av typen Tu-22.
(©NPK)
